На почетокот на пандемијата, работите беа многу јасни - се чекаше вакцината и се надевавме дека тоа ќе биде крајот на кошмарот наречен коронавирус.
Но, работите не се одвиваат како што повеќето од нас се надеваа. Вакцината пристигна, маските сѐ уште се задолжителни, инфекцијата со коронавирус е сè уште многу честа појава, а тестирањето е секојдневие.
Јасно е дека многумина ги сменија начините на функционирање и преминаа од долгорочно на краткорочно планирање. Но, дали е тоа добро за нашето ментално здравје?
Животот во „привремена состојба“ може да создаде чувства на вознемиреност и непријатност. Може да биде крајно вознемирувачко кога немаме чувство дека нешто е трајно, а работите се минливи“, изјави за verywellmind.com психотерапевтот Џејни Голден.
Многумина, исто така, имаат постојан страв од инфекција, дури и ако се вакцинирани, а грижата за своите постари најблиски не престанува речиси две години. Сето тоа нѐ носи до ментален склоп да живееме ден за ден.
Психологот Сабрина Романоф предупредува дека во изминатите две години луѓето си поставиле цели и очекувања кои биле отфрлени со молскавична брзина поради неочекуваниот развој на настаните.
„Со поставување краткорочни цели е поверојатно дека ќе ги остварите и тоа за возврат го зајакнува чувството за надеж, достигнување и напредок“, вели психологот, кој ја припишува оваа промена на нашата издржливост и способност да најдеме радост во непредвидливото.
Д-р Џулијан Лагој, психијатар, предупредува дека има многу луѓе кои се вознемирени и кои се фокусираат на далечната иднина и на најлошите сценарија:
„Им велам да не се грижат толку многу за иднината и наместо тоа да се фокусираат на сегашноста и на она што можат да го постигнат на дневна основа, а тоа е генерално добро за нивното ментално здравје. Препорачувам таква промена на размислување на секој што се чувствува лошо и неволно“.
Ако не знаете како да ги претворите долгорочните цели во краткорочни, психотерапевтот Џејни Голден има неколку совети:
- Фокусирајте се на она што можете да го контролирате, а не на она што не можете - тоа ќе ви помогне да се чувствувате посилни и помалку вознемирени.
- Фокусирајте се преку вежби за свесност како што се дишење или медитација.
- Фокусирајте се на сегашноста. Без разлика дали живеете во пандемија или не, единствената гаранција во животот е токму овој момент, сега.
- Запомнете дека пандемијата не е вашата прва тешкотија - дури и ако е најдолга - и размислете што ви помогнало во претходните предизвици.
- Вежбајте благодарност. Кога доаѓаме од место со „доволно“ изобилство и уважување, можеме да се чувствуваме опуштено, да видиме можности и да чувствуваме надеж.
Исклучително е важно да запомните дека не сте сами ако чувствувате дека оваа пандемија е бескрајна и огромна. Ќе има и добри и лоши денови. Бидете позитивни и потпирајте се на вашите најблиски додека поминуваме низ овој тежок период.