Актерот Даниел Крег јавно се прости со улогата на Џејмс Бонд за време на светската премиера во Лондон, а веќе почнаа дискусиите за тоа кој ќе го замени легендарниот актер во улогата на популарниот шпион.
Филмските критичари и обожаватели на Џејмс Бонд веќе дискутираат за тоа, а во трката се големи холивудски имиња како Том Харди, Џејмс Нортон, Хенри Голдинг и други.
Коментирајќи кој би можел да го замени, Крег изјави дека не би сакал тоа да биде Хју Џекмен. Кога во 2006 година ја презеде оваа улога, за неа беше заинтересиран и Џекмен, а во медиумите веќе некое време трае шегувањето меѓу двајцата актери на оваа тема.
Крег ја коментираше и идејата за создавање женски Џејмс Бонд.
„Одговорот е едноставен, потребно е да се пишуваат подобри улоги за жени. Зошто би требало Џејмс Бонд да го глуми жена кога е можно да направите женски лик еднакво добар како Бонд, само женски?“, изјави актерот.