Историски момент се случи денеска со изборот на Џо Бајден за 46. претседател на САД – земјата ја доби првата жена потпретседател на државата, Камала Харис, која е со афроамериканско и индиско потекло.
Кандидатот на демократската партија Џо Бајден е избран за 46. претседател на САД, објавија водечки светски новински агенции и медиуми како CNN, BBC, The Guardian, The New York Times и други.
Камала Харис е првата Афроамериканка која една од двете водечки партии воопшто ја кандидирале за потпретседател во историјата на САД.
Таа е четврта жена што досега ја кандидирала Демократската партија. Претходно сите три изгубиле – две како кандидатки за потпретседател, а Хилари Родам Клинтон изгуби како ривал на актуелниот претседател Доналд Трамп.
Камала Харис (55) и сама се кандидираше за претседателска номинација од Демократската партија пред да го поддржи Бајден.
Кога беше избрана во Сенатот во 2016 година беше само втората афроамериканска сенаторка во историјата на Горниот дом на американскиот Конгрес.
Пред да биде избрана за сенаторка беше главен државен обвинител во Калифорнија.
Харис преку социјалните мрежи порача дека ѝ е чест што е номинирана и дека Џо Бајден може да ги обедини Американците.
Позната е по директните и остри прашања, особено за време на истрагата за потврда на кадидатурата на Брет Кавано за врховен судија.
Нејзината кандидатура за потпретседателка би можело да придонесе за поголем одзив кај афроамериканските гласачи кои се најлојално гласачко тело на Демократската партија.
Претседателот Доналд Трамп е изненаден што неговиот противкандидат Бајден ја избрал Камала Харис за своја кандидатка за потпретседател, бидејќи, како што изјави, таа била многу лоша кон Бајден за време на дебатите.
Трамп рече дека Харис била „многу, многу непријатна“ кон Бајден за време на внатрепартиските избори на демократите.