Словенија избра адвокатка поврзана со поранешната прва дама на САД Меланија Трамп за прва жена шеф на државата.
Наташа Пирц Мусар е новинарка и адвокатка која се кандидираше како независен кандидат со поддршка на словенечката левоцентристичка влада.
Таа го победи поранешниот министер за надворешни работи Анже Логар - ветеран на конзервативната политика.
Пирц Мусар освои речиси 54 отсто од гласовите, пред Логар кој доби нешто повеќе од 46 отсто, соопшти изборната комисија.
Излезноста кај населението од околу два милиони беше 49,9 отсто, соопшти Комисијата.
„Словенија избра претседателка која верува во Европската Унија, во демократските вредности врз кои е основана ЕУ“, рече Пирц Мусар по нејзината победа.
Таа истакна дека светот „се соочува со тешки времиња поради климатските промени“.
„Младите луѓе сега ја ставаат одговорноста на нашите политички плеќи да се грижиме за нашата планета, така што нашата следна генерација, нашите деца, ќе живеат во здрава и чиста животна средина“, рече таа.
Улогата на претседател во Словенија е главно церемонијална, но Пирц Мусар ќе биде врховен командант на вооружените сили и исто така ќе номинира неколку високи функционери, вклучувајќи го и гувернерот на централната банка.
Пирц Мусар беше ангажирана како адвокат за да ги заштити интересите на г-ѓа Трамп, која е родена во Словенија, додека Доналд Трамп беше претседател на САД.
Во 2016 година, Пирц Мусар и нејзиниот клиент поднесоа тужба против списанието Suzy во Словенија бидејќи сугерираа дека г-ѓа Трамп работела како ескорт девојка од висока класа додека бркала меѓународна манекенска кариера. Постигната е вонсудска спогодба.
