Чадор-организацијата на европскиот фудбал (УЕФА) покрена истрага против Фудбалската федерација на Косово поради пречекот што навивачите на оваа репрезентација му го приредија на Израел во квалификациите за Европското првенство.
Квалификацискиот дуел меѓу Косово и Израел се одигра прексиноќа, а домашните се радуваа на победата со минимални 1:0. Но, Косово ќе се најде во неволја бидејќи УЕФА покрена истрага против Фудбалската федерација на Косово.
Причината е начинот на кој Израелците беа пречекани на стадионот „Фадиљ Вокри“ во Приштина. Косовските навивачи ја исвиркаа израелската химна, а исто така свиреа и при секој допир на топката од гостинските играчи.
„Контролниот, етичкиот и дисциплинскиот комитет на УЕФА во наредниот период ќе се занимава со овој случај“, се наведува во соопштението, а сосема е сигурно дека Косовците ќе се соочат со финансиска казна заедно со можност за затворање на стадионот.
Како што е познато, натпреварот меѓу Косово и Израел требаше да се одигра на 15 октомври 2023 година, но беше одложен за 12 ноември поради израелската воена интервенција во Појасот Газа како одговор на бруталниот терористички напад на Хамас на 7 октомври.
Да потсетиме, Косово забележа победа со голот на Милот Рашица во 41. минута, што го оддалечи Израел од евентуален директен пласман на ЕУРО, но и го доближи до бараж против Босна и Херцеговина преку Лигата на нации.