Европските и американските трговски синџири за облека не успеваат да се ослободат од залихите и ги намалуваат нарачките за пролетните колекции.
Фабриките во Бангладеш залудно чекаат нарачки, бидејќи во ковид-светот пижамите се најбаран моден производ.
Глобалната модна индустрија само што почна да се опоравува од тешката 2020 година, кога пристигна нов удар - нов бран на ширење на вирусот и ограничувањата со кои владите се обидуваат да го запрат, како и нееднакви програми за вакцинација.
Некои трговски синџири сè уште не успеале да се ослободат од облеката од минатата година, што во нормални услови би одела „како алва“ на распродажба.
Британски Primark така ја има на залиха колекцијата пролет/лето 2020, вредна 150 милиони фунти и колекцијата есен/зима 2020 вредна 200 милиони фунти.
Од консултантската куќа McKinsey & Company, вредноста на непродадената облека во светот, во продавниците и магацините, ја проценуваат на 140 до 160 милијарди евра, што е повеќе од двојно од нормалното ниво.
Проблемите на тој начин се прелеваат на големите производители на облека, како што е Бангладеш, кој најмногу се потпира на извозот на текстил. Фабриките се борат да останат отворени.
Здружението на производители и извозници на облека од Бангладеш спроведе истражување во педесет фабрики и откри дека оваа сезона добиле 30% помалку порачки од вообичаеното, поради локдаунот пред Божиќ во поголем дел од Европа.
Нови проблеми пристигнаа во јануари со новите мерки за локдаун.
„Нарачките обично пристигнуваат три месеци однапред. Но, нарачките за март не пристигнаа“, рече сопственикот на фабриката, Шахидулах Азим, чии клиенти се трговци од Северна Америка и Европа.
„Работиме со 25 проценти од капацитетот. Имам некои надежи дека фабриката ќе работи во февруари, но после тоа не знаеме каква ќе биде нашата иднина. Тешко е да се каже како ќе преживееме“, додаде Азим.
Минатата година беше тешка за индустријата за облека, која забележа пад на продажбата од околу 17 проценти, според Euromonitor, а иднината е неизвесна. Проценките на McKinsey & Company за 2021 година се движат од песимистичките предвидувања дека ќе падне за 15 проценти до проценките на Euromonitor дека ќе се намали за „само“ 11 проценти.
Дали има светла точка? Популарноста на пижамите за време на блокадата донесе одредено олеснување.
„Ако сакате да знаете што да облечете во Велика Британија - пижамите се вратија во мода“, рече извршниот директор на Marks & Spencer, Стив Роу, во јануари. Hugo Boss одговори на истиот феномен, намалувајќи ја понудата за класична деловна облека и проширувајќи ги колекциите лежерна мода и облека за дома.
За некои производители, тоа е мала утеха. „Побарувачката за пижами никогаш не била поголема, но не може сите да шиеме пижами“, вели Али.