Експертите се загрижени дека следниот бран на заболувања ќе биде фокусиран на менталното здравје, предизвикан од загриженоста во врска со COVID-19.
Повеќе од половина година живееме во пандемија и многу луѓе, иако го избегнале заболувањето со COVID-19, се уморни и им е смачено да живеат во новата реалност што ја предизвика коронавирусот.
Овој нов вид на стрес има име: КОВИД умор.
Стресот што го предизвикува новата реалност и секојдневната неизвесност најтешко им паѓа на оние луѓе кои ги почитуваат мерките и сериозно ја сфаќаат опасноста од COVID-19, па се чувствуваат дека носат двоен товар – својот и на оние кои не го прават тоа или полошо: негираат дека вирусот постои и е опасен.
И едните, и другите, се соочени со големото прашање: Кога ќе заврши пандемијата? Според историчарите, обично има две сценарија како завршуваат пандемиите: медицинско, што се случува кога ќе паднат стапките на инциденца и смртност (или ќе се најде вакцина); и социјално – кога ќе спласне епидемијата на страв од болеста.
Експертите велат дека со физичка активност, отворена комуникација за чувствата и фрустрациите и мала промена на перспективата може да помогнат за намалување на стресот.
„Живееме во пандемија, доживуваме нешто што за првпат ни се случува во нашите животи“, вели Дејвид Сбара, клинички психолог и професор на Универзитетот во Аризона.
„Пандемскиот умор, или КОВИД умор е краток начин да кажеме дека сите сме повеќе под стрес, се соочуваме со депресија и анксиозност и сме преморени и сме во жалост по стариот начин на живот во многу погледи“, вели тој.
Сбара објаснува дека сменети ни се идентитетите бидејќи сега живееме во поинакви, изменети, непознати и по малку страшни околности. Сменети се нашите рутини, а за некои од нас целосно неповратно изгубени. Без таа стабилност, заедничко ни е тоа чувство дека сме изгубени во секојдневниот живот.
„Затоа не си задавајте цели како ‘Ќе медитирам секој ден’“, советува Сбара и додава дека иако медитацијата им помага на некои луѓе, грижата за менталното здравје почнува во наоѓање на изворите на стрес и идентификување на оние работи врз кои имате контрола.
Тој вели дека е многу важно да не се преокупирате со пандемијата, но сепак да одржувате едно свесно ниво на внимателност.
„Можеме да ја победиме пандемијата со едноставни промени во нашето однесување – носење маска, држење дистанца, често миење раце.“
Сбара верува дека на крајоот, нашето физичко и ментално здравје можат да се опорават од „КОВИД уморот“.
„Ќе дознаеме дека сме пожилави отколку што сме мислеле“, вели тој.
