После две недели континуиран раст на заразени од COVID-19, кривата се исправа, а значително е зголемен интересот за вакцинација кај граѓаните. Невакцинирани од новозаразените со COVID-19 се 85% и 91% од хоспитализираните.
Вчера се регистрирани 1.074 нови случаи со COVID-19 од 7.571 тестирање, а 24 пациенти починале. Регистрирани се и 291 оздравен. Ковид-центарот во Тетово евидентира најлоши 24 часа во текот на пандемијата со најмногу – 9 починати и 18 хоспитализирани, а поради сериозни компликации од повеќе хронични болести пациенти со коронавирус биле однесени и во Скопје.
Вкупната бројка на ковид-дијагностицирани лица во нашата земја од почетокот на епидемијата изнесува 166.741, на оздравени пациенти е 151.692, на починати е 5.632, а бројот на активни случаи изнесува 9.417.
Според податоците на Министерството за здравство вакцинирани се вкупно 638.428 граѓани, а ревакцинирани 495.803, односно аплицирани се вкупно 1.134.231 дози вакцини. Прва доза завчера примиле 13.275, а вкупно се вакцинирале 17.623 граѓани. Со последните бројки, барем една доза вакцина примиле 70% од населението над 70 години, 67% од луѓето над 65 години, 63% од тие што се повозрасни од 60 години и 53% од населението над 50 години.
Министерството за здравство апелира на масовно вакцинирање за да се спречи тешка форма на болеста и да се намали ризикот од заболување, како и смртен исход.
Потсетува дека за вакцинирање не е потребно закажување кое важи само за малолетници од 12 до 17 години кои треба да бидат пријавени за термин на веб-страницата vakcinacija.mk.
Министерот за здравство Венко Филипче вчера во интервју рече дека имунитетот од вакцината штити многу повеќе од прележана болест.
– Препораките кои ги коминицирам во јавноста преку алатките на Министерството за здравство се должат на препораките на сознанијата на стручни лица, а тоа се имунолози кои што работат со вакцина, фармаколози, професори на фармацевскиот факултет и од тука се препораките. Има една студија која што вели дека оние кои се вакцинирани можат да заболат со ризик од 0,07%, а 1,2% од прележаните можат да заболат. Што значи дека кај нив е поголем ризикот и од тука таа препорака за што кратко време од прележувањето, а тоа е после месец дена и дополнителни две недели да се организира севкупниот процес е нешто што на граѓаните допонително им го штити здравјето, појасни Филипче.
Сите сериозни студии на големи испитаници, појасни министерот, одат во насока на тоа и дека што порано вакцина, дополнително го штити здравјето.
Според двонеделната анализа на Министерството за здравство на територијата на државата, од позитивните на COVID-19, 1.507 биле целосно вакцинирани (со две дози) или само 15%.
– Голем е бројот на невакцинирани граѓани кои се заразиле со COVID-19. Според двонеделната статистика, 8.374 граѓани од позитивните не биле вакцинирани. Процентот на хоспитализирани лица кои се невакцинирани изнесува 91, додека само 9% од сите 724 моментно хоспитализирани пациенти се целосно вакцинирани. Смртноста кај невакцинираните е драстично поголема, покажува анализата. Во период од две седмици на територија на државата починало 101 лице, 92 пациента од починатите не биле вакцинирани, а само 9 лица, односно 8%, примиле вакцина. Според анализите, починатите имале повеќе хронични заболувања, наведува Министерството.
Заразените и починатите се вакцинирани со вакцини што ги има на располагање кај нас, како и вакцини Moderna и Johnson & Johnson, кои некои од пациентите ги примиле во странство.
– Секоја вакцина што ја имаме на располагање е безбедна, ја намалува шансата од заболување, спречува тешка форма на болеста и штити од смртен исход. Апелираме граѓаните да се вакцинираат, само така ќе дојдеме до колективен имунитет и ќе спречиме ширење на мутации на SarsCov2, истакнува МЗ.
Во анализата за вакцинирани се сметаат лицата вакцинирани со две дози, кои поминале најмалку 14 дена од примање на втора доза.