Дејан Кулушевски по завршувањето на сезоната ќе го напушти Тотенхем и ќе се врати во Серија А, тврдат италијанските медиуми.
Македонецот роден во Шведска игра во променлива форма оваа сезона во Премиер лигата, на 28 натпревари постигна 6 гола и само 3 пати асистираше.
Кулушевски во Тотенхем пристигна пред две и пол години од Јувентус за 30 милиони евра.
Според локалното радио во Неапол, сѐ уште актуелниот шампион на Италија работи на трансферот на Кулушевски.
Се очекува клубот да заработи од продажбата на Виктор Осимхен (се шпекулира сума од 120 милиони евра) и дел од парите ќе ги инвестира во крилниот напаѓач, чија вредност се проценува на 55 милиони евра.
Во Италија, покрај за Јувентус, играше и за Аталанта и Парма, каде имаше одлична сезона која го овозможи трансферот во редовите на „Старата дама“.
Кулушевски играше за репрезентацијата на Македонија до 16 години за која на 5 натпревари постигна 6 гола, но потоа одлучи да игра за Шведска. И покрај тоа што ФФМ и тогашниот селектор Игор Ангеловски направија сѐ што можеа за да го премислат, Дејан бешпе одлучен. За Шведска оттогаш запиша 37 настапи и постигна 3 гола. Меѓутоа, со „Викинзите“ настапи само на ЕУРО 2020, на кое ќе играше и да ја одбереше Македонија, бидејќи потоа Шведска не успеа да се квалификува на Мундијалот 2022 и на ЕУРО 2024.
