Задоволен пред сѐ од играта вчера против Реал Сосиедад, тренерот Роналд Куман доби голема доза оптимизам дека Барселона конечно ќе заблеска и ќе се врати онаму каде што ѝ е местото, на врвот.
„Со вакво однесување и интензитет ние ќе се вратиме онаму каде што треба да бидеме. Ова беше најдоброто прво полувреме сезонава. Бевме добри со топка и игравме добар пресинг“, рече тој во изјава за Movistar.
Иако гостите први поведоа преку Вилиан Хосе во 27. минута, Барса брзо се оправи и само четири минути подоцна израмни преку Жорди Алба, а на две минути пред паузата Френки де Јонг се погрижи за комплетен пресврт.
„Во вториот дел Сосиедад одигра одлично. Беше натпревар со висок стил и многу интензитет. Не може да имате контрола цели 90 минути. Прикажаното од тимот беше навистина импресивно. Заслуживме да победиме токму поради однесувањето“, смета холандскиот стратег.
„Тоа беше најдобриот натпревар годинава. Навистина сум задоволен од однесувањето на тимот и прикажаната борба. Бевме многу мотивирани и продолжуваме да се искачуваме на табелата“.
Инаку, ова беше натпревар од 19. коло кој се одигра порано од предвиденото бидејќи токму овие два клуба на 13 јануари играат еден против друг во полуфиналето од шпанскиот Суперкуп.