Лекарската комора на Република Северна Македонија преку соопштение најостро го осуди најновиот инцидент во ЈЗУ ГОБ „8 Септември ” – Скопје во кој, вчера во вечерните часови, роднини на почината 60-годишна пациентка од COVID-19 се обиделе насилно да го земат телото на починатата и упатиле закани кон докторката.
Комората, се посочува во соопштението, има разбирање за здравствените проблеми на пациентите и со нивните блиски, но и во оваа прилика јасно се декларира дека осудува какво било насилство врз медицински персонал, дотолку повеќе што медицинарите секојдневно, во услови на пандемија, се борат за животот на пациентите.
-Сведоци сме дека во изминатите пет месеци докторите и севкупниот здравствен персонал се бореа за секој човечки живот и затоа Комората го осудува секое непочитување на нивната работа, труд, жртва и ризик со кој се изложуваат на највисоко ниво во пружањето на услугите. Пациентите треба да имаат предвид дека здравствениот персонал безрезервно и максимално се вложува за нивното здравје, за сметка на своите семејства. Затоа сметаме дека тие заслужуваат само поддршка, а не закани. Лекарската комора апелира секој во рамки на своите ингеренции да се вклучи во заштита од насилство врз здравствените работници и соработници. Заложбата на Лекарската комора е за јасно и транспарентно делување во кое нема никаква толеранција за насилство насочено против лицата кои даваат здравствени услуги, а тоа мора да се воведе на сите нивоа во секторот на здравствена заштита и јавно да се поддржува од сите инволвирани, стои во соопштението.
И министерот за здравство Венко Филипче остро го осуди овој настан.
Ова е чин на крајно непочитување на сите здравствени работници кои повеќе од 4 месеци деноноќно се борат за секој човечки живот. Ова е дискредитација на нивната работа, нивниот труд и жртва, ризикот на кој се изложени и одрекувањата, напиша Филипче на неговиот Facebook профил.
Тој посочи дека овие луѓе со месеци ги немаат видено своите семејства, ги немаат прегрнато своите најблиски, немаат ден одмор и оддишка од напорната работа. „Најостро го осудувам овој инцидент“, напиша министерот за здравство.
