Политичката партија Левица денеска побара од Уставниот суд да ја укине функцијата прв заменик на претседателот на Владата која според нив е неуставна.
„Членот на Президиумот на Левица, м-р Реџеп Исмаил - Хактан, одржа прес-конференција, на којашто ја информира јавноста дека Левица поднесе ИНИЦИЈАТИВА, т.е. претставка до Уставниот суд за оценување на уставноста и законитоста на подзаконски акт, односно Деловникот за работа на Владата на РМ, којшто СДСМ и ДУИ го променија во месец септември и со тоа противуставно воведоа нова и непостоечка државна функција - „Прв заменик на претседателот на Владата“, на којашто го поставија Артан Груби“, објаснуваат од новата парламентарна партија.
„Со ваквите измени на Деловникот за работа на Владата, каде се предвидува оваа нова функција, власта ги пречекорува уставните ограничувања кои важат за владата, како извршна власт, и буквално со ваквото нејзино самоволие, таа врши еден вид централизација на целокупната власт во себе и покажува тенденција за доминација во сите сфери на општественото живеење, затоа што ова сериозно го нарушува принципот на тријалистичка поделба на власта - како темелна вредност на нашиот уставен поредок“, стои во соопштението објавено на Facebook страницата на партијата.