По одличниот триумф во миланското дерби, стигнаа лоши вести за Милан: повредата на Златан Ибрахимовиќ е посериозна одошто се мислеше, па Швеѓанецот дополнително ќе остане надвор од теренот.
Ибра не играше во саботата против Интер каде одлично беше заменет од Оливје Жиру, кој со два гола го реши градското дерби. 40-годишниот Златам е надвор од зелениот терен од 23 јануари кога се повреди против Јувентус и сѐ уште се нема вратено ниту на тренинг.
Според La Gazzetta dello Sport, сериозноста на повредата е многу поголема отколку што сметаа клупските лекари, па Златан ќе мора да мирува најмалку и на наредните два натпревара против незгодните Лацио и Сампдорија.
Популарниот весник со розеви страници пишува дека „со секој изминат ден не е нити ден поблиску враќањето на Ибра“. Медицинскиот тим на „Росонерите“ ја проценува ситуацијата, но историјата на повреди на напаѓачот ветеран е загрижувачка бидејќи Ибра одигра само 11 натпревари во Серија А сезонава, а пропушти 8.
Милан го пречекува Лацио утревечер на „Меаца“ во рамките од четвртфиналето на Копа Италија, додека со Сампдорија се среќава в недела во Серија А, исто така на домашен терен.
Договорот на Ибра со Милан истекува во јуни, а во саботата спортскиот директор и легенда на клубот Паоло Младини откри дека двете страни се заинтересирани за продолжување на соработката на уште една сезона.
