Белорускиот претседател Александар Лукашенко денеска изјави дека е подготвен да ги пренесе овластувањата откако ќе биде усвоен нов Устав на земјата.
„Потребен ни е нов Устав. Ми беа предложени две варијанти, но и двете ги одбив, бидејќи едвај се разликуваа од сегашната. Во тек е работа на трета верзија. Дојдете, да седнеме и да работиме на уставот, па да го ставиме на Референдум“, изјави Лукашенко при посетата на фабриката МЗКТ во Минск.
Тој потенцираше дека ќе ги пренесе своите овластувања со Устав, но, како што рече – не со притисок, и не на улица. Лукашенко, уште дополни, дека планира да ја напушти функција, порано или подоцна.
„Секако дека ќе заминам еден ден. За година, две…Но овој Устав не можеме да го препуштиме било кому. Тоа ќе биде катастрофа. Од тоа најмногу се плашам“, изјави белорускиот претседател.
Лукашенко го заврши говорот со зборовите: „Фала многу, јас кажав што имав да кажам. Сега можете да почнете со скандирање ‘Оди си’“, а толпата му одговори токму со зборовите „Оставка! Оставка!“.
Претседателските избори во Белорусија се одржаа на 9 август. Според Централната изборна комисија, актуелниот претседател добил 80,1 отсто од гласовите, но демонстранти со денови протестираат, обвинувајќи за изборен фалсификат. И западните држави оценија дека изборите во Белорусија не биле фер, ниту демократски.
