Белорускиот претседател Александар Лукашенко изјави дека му рекол на рускиот претседател Владимир Путин дека „ги запрел сите коронавируси во светот“, бидејќи поради војната во Украина веќе никој не ѝ обрнува внимание на пандемијата како што беше досега случај.
„Вчера му реков на Путин: Слушај, добро си направи - војната е војна, но веднаш ги спречи сите коронавируси во светот, сите оздравеа“, рече Лукашенко, пренесува РИА Новости.
Лукашенко додаде дека светот сега се прераспоредува и праша каква улога одиграла пандемијата во тоа.
„Сè уште (не знам), но јас сум склон на тоа (дека имала голема улога). Кога ќе споредиме сè, ќе извлечеме заклучоци“, рече Лукашенко.
Претседателот на Белорусија синоќа на космодромот „Восточный“ се сретна со рускиот лидер Владимир Путин, а денеска е во Владивосток.
