Претседателот на Белорусија, Алјаксандр Лукашенко, се закани со реципрочни мерки како одговор на воведувањето санкции против таа земја поради резултатите од претседателските избори, кои не се признати од опозицијата, но и од ЕУ и САД.
– Јас ѝ наложив на Владата да достави предлог сите трговски текови од пристаништата во Литванија да бидат насочени кон другите. Ајде да видиме како тие ќе живеат со тоа, рече Лукашенко.
Министрите за надворешни работи на ЕУ решија да воведат санкции за 20 високи белоруски функционери осомничени за изборни измами и полициска репресија на учесниците во граѓанските протести во Белорусија.
Белорускиот претседател денеска на половина армија ѝ нареди да влезе во состојба на борбена готовност, како одговор на она што тој смета за закана од Западот, јави агенцијата BelTA.
Тој истакна дека ставањето половина од армијата во режим на борбена подготвеност „не е евтино“.
