Голот со глава на Роберт Левандовски ја круниса вчерашната победа од 3:0 на минхенски Баерн против Лион во полуфиналето од Лигата на шампиони на стадионот „Жозе Алваладе“ во Лисабон.
Голот исто така му помогна на Полјакот да се запише во историјата на ЛШ веднаш до Кристијано Роналдо. Покрај тоа што Левандовски има постигнато гол на секој натпревар од изминативе девет, ова беше 15-ти за него во оваа сезона на ЛШ (55-ти на сите натпреварувања).
Само Роналдо во една сезона има дадено повеќе од него. Португалецот во 2013/14 постигна 17 гола, а во 2015/16 даде 16. Ефектот на Левандовски дополнително добива на тежина кога ќе се земе предвид дека две елиминациски рунди ги игра само по еден меч, а Роналдо во своите сезони играше двомечи. Како му тргнало, Левандовски има големи изгледи да забие два гола во финалето против ПСЖ на 23 август и да го надмине Роналдо.
На вчерашниот меч се случи уште еден куриозитет - фудбалерот од средниот ред на Баерн Серж Гнабри синоќа постигна два гола. Со тоа 25-годишниот играч стана вториот Германец двоен стрелец на еден полуфинален двомеч. Претходно во сезоната 2012/13, тоа го стори уште еден играч на Баерн, Томас Милер. Тој постигна два гола против Барселона (4:0).
