Група мајмуни во Индија убиле 250 кучиња од одмазда во последниот месец, фрлајќи ги од високи дрвја и згради.
Жителите на Лавула, град во сојузната држава Махараштра со околу 5.000 жители, на околу 480 километри од Мумбај, велат дека мајмуните почнале да се одмаздуваат пред еден месец откако глутница кучиња убила млад мајмун.
Оттогаш мајмуните фаќалe кучиња, ги влечеле и ги фрлале од високи дрвја и куќи. Во местото речиси и да нема повеќе кучиња, но нападите на мајмуните не престануваат.
Фотографиите и видеата на локалните медиуми покажуваат мајмуни кои држат кучиња на покривите и гранките, како и кучиња кои бркаат мајмуни низ селото додека жените и децата се засолнуваат на безбедно.
Забележано е дека мајмуните напаѓаат и деца, што предизвикало паника кај родителите. Мештаните апелираа до локалните власти да помогнат во фаќањето на одмаздољубивите мајмуни, а некои се обиделе сами да ги фатат и да ги спасат кученцата, па неколку луѓе се повредени.
Експертите за однесување на приматите велат дека студиите покажале дека мајмуните можат да се одмаздат и често им одговараат на оние поврзани со првобитниот агресор откако ќе бидат нападнати.
Мајмуните макаки се познати по тоа што се исклучително интелигентни, но и лукави. Не е невообичаено да ограбуваат остави и фрижидери или да крадат облека и разни предмети.