Тимот од скопската населба Ѓорче Петров загуби убедливо на реванш гостувањето во соседна Бугарија и се соочи со експресна елиминација од Европа конференциската лига на УЕФА.
„Лавовите“ отпатуваа за Софија со 0:0 од првиот натпревар минатиот четврток во Скопје, но вечерва на реваншот беа поразени. Како победници на Купот на Македонија стартуваа од 2. коло, но и веднаш се соочија со елиминација.
Домашниот тим на ЦСКА Софија поведе во 31. минута кога холандскиот бек Јурген Матеј, кој е и капитен на бугарскиот клуб, погоди откако најдобро се снајде во гостинскиот шестнаесетник после удар од аголот.
На средината од второто полувреме, во 61. минута, домашните го дуплира аводството откако мрежата на младиот Христијан Стевковски ја затресе Георги Јомов.
Третиот гол падна во 78. минута кога погоди српскиот интернационалец Лазар Туфеџиќ, додека конечните 4:0 ги постави напаѓачот од Хаити, Дикенс Назон.
ЦСКА во 3. коло ќе игра против подобриот од дуелот на ирскиот Сент Патрикс со словенечка Мура.
