Вечерва во Штип започнува 37-то издание на реномираниот фестивал на забавна музика ,,Макфест 2022”.
На Макфест годинава нема да се доделуваат награди, наместо да биде од натпреварувачки карактер целта е да излезат квалитетни песни и рефрени кои ќе се паметат.
Со многу новитети, песни во енергичен ритам, наместо препознатливите балади, црвен тепих и ветувања за хитови кои ќе ги донесе манифестацијата, уште една измена е и тоа што ќе има дури пет водители, пренесе Фокус. Маријана Стојановска и Димитар Атанасовски се најавени како главни водители, а презентери ќе бидат Лила Филиповска, Миланка Рашиќ и Јана Бурческа.
Слоганот на годинашното издание е „Бранови на македонската музика“. Оваа година Макфест е финансиран од страна на Општина Штип со 5 милиони денари, а од спонзорите, поддржувачите и пријателите на Фестивалот со еден милион денари.
Градоначалникот Иван Јорданов истакна дека средствата кои биле понудени од страна на Министерството за култура во износ од 400.000 денари биле одбиени, бидејќи овој фестивал заслужува повеќе.
– Неколкупати досега сме споменале дека со домаќинско работење средства има за сѐ, и за капитални инвестиции, но и за еден сегмент во културата, во спортот. Средствата кои се определени за Макфест се доволни за да се организира овој фестивал на едно ниво на кое поскауваме. „Макфест 2022“ ќе го врати стариот сјај, ќе биде во тек со современите технички достигнувања, а целиот град ќе пулсира во духот на нематеријалното културно наследство“, вели градоначалникот.
Фестивалот нема да биде од натпреварувачки карактер, туку од ревијален, но затоа е зголемена сумата за откуп на песни.
Ќе слушнеме 24 композиции во изведба на Тамара Тодевска, Ламбе Алабаковски, Андријана Петрушовска, Дејан Тасев, Викторија Лоба, Мартинијан Кириловски, Андреа Коевска, Виктор Апостоловски и други.
Македонската телевизија ќе врши директен пренос од двете фестивалски вечери.
