Францускиот претседател Емануел Макрон денеска во Пекинг се сретна со кинескиот претседател Си Ѓинпинг и му кажа дека „знае дека може да смета“ дека ќе ја вразуми Русија, пренесува Guardian.
Макрон, кој вчера пристигна во Кина во тридневна државна посета, се ракуваше со Си во срцето на кинеската престолнина. Си го пречека својот гостин со црвен тепих, кинески и француски знамиња и националните химни, пренесува AFP.
„Руската агресија во Украина ѝ нанесе удар на стабилноста. Знам дека можам да сметам на вас да ја вратите Русија на страната на разумот и сите страни на преговарачка маса“, му рекол Макрон на Си.
За време на посетата на Пекинг, францускиот претседател рече дека Кина може да „игра значајна улога“ на патот кон мирот во Украина и ја поздрави „волноста и посветеноста на Кина за решавање на конфликтот“.
Претседателката на Европската комисија Урсула фон дер Лајен му се придружи на Макрон во Пекинг. Макрон рече дека „сака да биде гласот што ја обединува Европа“ по прашањето за Украина, а неговото патување во Кина со шефот на ЕК „дополнително ја нагласува доследноста на таквиот пристап“.
