Италијанскиот селектор, нормално, е пресреќен од победата и првиот континентален трофеј за „Аѕурите“ по 1968 година.
Роберто Манчини ја воскресна Италија. Од репрезентација која не успеа да се квалификува за Мундијалот 2018 во Русија создаде непрепознатлив тим кој сега е на врвот на Европа.
„Само што почна натпреварот примивме гол и се мачевме. Потоа почнавме да доминираме и така беше до крај. Момците беа неверојатни, не знам што повеќе да кажам. Ова е важно за сите луѓе и за сите навивачи“, рече Манчини говорејќи за италијанските медиуми.
Италија почна лошо бидејќи уште во 2. минута се затресе мрежата на Џиџи Донарума. Потоа одреден период им требаше да се повратат од раниот шок, за потоа да почнат да ја играат својата игра со држење на топката не дозволувајќи им на Англичаните да играат.
„Задоволни сме што успеавме да се држиме до нашата игра и да победиме. Се надевам навивачите сега слават. Среќни сме, сега само тоа е важно“.
Успеаја да израмната, а потоа откако не успеаја да постигна победнички гол, натпреварот замина на продолжениј, па пенали од каде Италијанците излегоа како победници.
„На пенали треба да се има и малку среќа, така да малку ми е и жал за Англија бидејќи и тие имаа прекрасен турнир. Мислам дека ќе продолжат да напредуваат. Ние многу напредувавме, но мислам дека можеме уште да напредуваме“
Манчини и неговиот поранешен соиграч од Сампдорија, сега тимски координатор на репрезентацијата, Џанлука Виали, синоќа одново целиот свет ги виде в прегратка, и тоа на „Вембли“, каде на клупско ниво не успеаја со клубот од Џенова.
„Нашето пријателство е нешто кое нема граници, бидејќи таа Сампдорија немаше граници. Сега затворивме еден круг, но морам да напоменам дека момците беа неверојатни“.
Манчини и Виали го предводеа нападот на Сампдорија во финалето од Купот на шампионите кое во 1992 година се одигра токму на „Вембли“. Тогаш не успеаја да го кренат пехарот откако Барселона победи со 1:0 на продолженија.