Култниот стадион „Маракана“ во Бразил ќе биде преименуван во чест на легендарниот фудбалер Пеле.
Овој потег следи по одлука на властите на сојузната покраина Рио де Жанеиро најпознатиот фудбалски стадион во светот во иднина да се вика „Едсон Аранчис ду Насименту - Реј Пеле“.
Гувернерот на покраината Рио де Жанеиро мора да одобри промена на името пред новото име да стане официјално, но тоа е само дел од протоколот.
Пеле, кој освои три Светски првенства како репрезентативец на Бразил, го постигна својот 1.000-ти гол на стадионот „Маракана“ во 1969 година, играјќи за Сантус против Васко да Гама.
Финалето на Светските првенства во 1950 и 2014 година се одржаа на „Маракана“, како и свеченото отворање на Олимписките игри во 2016 година.
Рекордни 200.000 гледачи на „Маракана“ имаше за финалето на СП 1950 година, кога Уругвај го шокираше домаќинот Бразил.
Капацитетот на стадионот сега е 78.838 места, а помалку е познато дека го носи официјалното име „Мариу Фиљу“ по еден новинар кој лобираше за нејзина изградба во 40-тите години на минатиот век, но меѓу љубителите на фудбалот беше исклучиво познат како „Маракана“, по областа во која се наоѓа.
