Репрезентацијата на Мароко продолжи со одличните игри на Мундијалот во Катар каде попладнево ја елиминираше Португалија и стана првата африканска држава која стигнала до полуфинале на турнирот на ФИФА.
Дека Мароканците не случајно ја поминаа групата без пораз каде ги победија Белгија и Канада, а ремизираа со Хрватска, докажаа и денеска со победата над Португалија извојувана со една борбена и беспоштедна битка со минимални 1:0.
Стрелец на победничкиот погодок вреден полуфинале беше 25-годипниот напаѓач на Севиља, Јусеф Ен-Несири во 42. минута. Играчот сезонава нема ниту еден гол постигнато за својот тим во Ла Лига, но има 2 во Лигата на шампиони.
Кристијано Роналдо повторно почна од клупата, а влезе во игра во 51. минута. Имаше една шанса, но неговиот удар кон крајот на натпреварот беше одбранет од одличниот Боно, кој се наметнува како најдобар голман на Мундијалот.
Мароко со пласманот во полуфиналето испиша историја бидејќи за прв пат африканска репрезентација успеа да стигне толку далеку. Најблиску досега беа Камерун во 1990, Сенегал во 2002 и Гана во 2010 кога беа елиминирани во четвртфиналињата.
Многу веројатно дека Роналдо го одигра својот последен Мундијал, со оглед на тоа што на наредниот во 2026 година ќе има 41 година. Како еден од најголемите фудбалери во историјата, Роналдо остана без единствениот пехар кој му недостасува во колекцијата, наречен Божицата на победата на ФИФА, по што излегувајќи од теренот не можеше да ги сопре солзите.