Претходно објавените фотографии на големи канали и огромни брановидни формации на површината на Марс сугерираа катастрофални поплави во минатото, а сега тоа и научно се докажува.
Научниците користеа податоци собрани од роверот Curiosity кој „работи“ на Црвената планета, за да докажат постоење на мегапоплави што се случиле во кратерот Гејл пред 4 милијарди години.
„За прв пат идентификувавме мегапоплави користејќи детални седиментолошки податоци што ги собра Curiosity. Депозитите оставени од мегапоплавите досега не биле идентификувани од податоците на претходните орбитери", рече Алберто Г. Фајрен, коавтор на текстот објавен во списанието Nature.
Фотографиите ги снимија камерите на роверот Curiosity кој е задолжен за набљудување на карпите и минералите во кратерот Гејл. Она што го забележале се седименти кои потекнуваат од огромни поплави по формирањето на планината Шарп и кратерот Гејл.
Научниците веруваат дека поплавите се предизвикани од ударот на огромен метеор што создало доволно топлина за да го стопи мразот на површината на планетата. Во тој процес, се ослободиле јаглерод диоксид и метан, кои во комбинација со вода испаруваат и на кратко формираат топла и влажна клима.
Ова довело до дожд на Марс, водата се излеала надолу по Шарп и го преплавила кратерот Гејл.
Присуството на вода може да значи присуство на живот. Затоа НАСА и другите вселенски агенции се обидуваат да најдат докази за постоење вода на други небесни тела во нашиот Сончев Систем.
Сега останува на роверот Perseverence да најде докази за праисториски живот на Марс, откако ќе слета на површината на Црвената планета, што е предвидено да се случи во февруари 2021 година.
