Елон Маск не можеше да го премолчи коментарот на Бил Гејтс кој смета дека електричните возила не се предвидени за долги патувања поради преголемите и претешки батерии и на Twitter му порача дека не знае ништо за електричните камиони.
Гејтс за електричните возила напиша во склоп на неговиот блог, изјавувајќи дека „подобрите и поевтини батерии ќе ги направат електричните возила пореалистична опција за секој корисник на автомобил“. Тој лично се сомнева дека моменталната и можеби идната технологија на батерии може да биде дополнително ефективна за големите возила.
Гејтс смета дека дури и големиот напредок во технологијата на батериите веројатно никогаш нема да биде практично решение за големите камиони, авиони и бродови. Електричната енергија е корисна ако патувате на мала оддалеченост, а нам всушност ни е потребно решение за тешките возила кои пренесуваат големи товари, напиша Гејтс.
Тој смета дека и алтернативните горива претставуваат подобро и еколошки поприфатливо решение за придвижување на големите возила како на пример камионите. Батериите, тврди Гејтс, се преголеми и претешки за големо растојание. На крајот, тој спомена и неколку компании кои произведуваат пикап возила, без да ја спомене Tesla, творецот на Cybertruck.
Компанијата Tesla работи на електричен камион, Tesla Semi за првпат е претставен во 2017 година, а првите камиони би требало да бидат испорачани во текот на идната година.
Ова не е прв интернет конфликт меѓу двајцата технолошки гиганти. Гејтс претходно го критикуваше Масk поради неточни изјави поврзани со COVID-19. Маск во меѓувреме изјави дека разговорите со Гејтс биле разочарувачки откако најбогатиот човек во светот наместо Tesla купи Porsche Taycan.
