Меколи Калкин е најпознат по улогата на Кевин Мекалситер од божиќните филмови „Home Alone“. Прогласен е за најуспешен детски актер, а во текот на врвот на кариерата во 90-тите години беше и најплатена ѕвезда во светот.
Со глума почнал на 4 години, а се има појавено во филмовите „My Girl“ (1991), „The Good Son“ (1993), „The Nutcracker“ (1993), „Getting Even with Dad“ (1994), „The Pagemaster“ (1994) и „Richie Rich“ (1994). На 14-годишна возраст се повлече од Холивуд за да посетува средно училиште.
Во 2004 година беше уапсен поради поседување марихуана и две контролирани супстанци без рецепт. Обвинет е за илегално поседување супстанци, а на суд ја призна вината. Беше ослободен со кауција од 4.000 долари.
Неговите пријатели и фанови долго време стравуваа за неговиот живот поради проблеми со зависноста, но пред неколку години изјави дека долго време е чист и сака да го промени животот.
На 18-годишна возраст актерот беше оженет со Ракел Мајнер, но нивниот брак траеше 4 години. Потоа 8 години беше во врска со актерката Мила Кунис.
Од 2017 година е во врска со Бренда Сонг, а во април годинава станаа родители. Го добија синот Дакота, кој името го доби по починатата сестра на Калкин.
Во последните години Калкин истражуваше различни деловни потфати, се обиде и повторно во глумата. Се занимава и со музика, а води и успешен подкаст.
Неодамна се појави на модната ревија на Gucci во Лос Анџелес, со свеж изглед. Според коментарите, на обожавателите им е драго што 41-годишниот актер се врати на вистинскиот пат.
