Министерството за здравство на Италија во петокот соопшти дека епидемиолошката слика се подобрува низ целата земја, поради што од денес стапија на сила новите одлуки за мерките за олеснување, што меѓу другото вклучува и отворање на кафулињата.
Провинцијата Лацио и престолнината Рим, како и Ломбардија и финансискиот центар Милано, во понеделникот станаа жолта зона, најниско ниво вотристепениот италијански систем за класификација на предупредувања за COVID-19.
Во овие региони, повторно е дозволено да се служи на маса во барови, кафулиња и ресторани во текот на денот, а по 18 часот може да се подготвува само храна за носење. Како што може да се види на фотографиите, и покрај ниските температури, многу граѓани решија да ја искористат оваа можност, па јуришаа кон кафулињата да испијат кафе на сонце.
Полицискиот час од 22 до 5 часот наутро и забраната за патување меѓу регионите остануваат во сила. Исклучоци се дозволени, како и досега, само за одење на работа и од здравствени причини.