Португалскиот фудбалер Кристијано Роналдо често е мета на провокации на противничките навивачи, а на последниот меч реши да одговори на скандирањата „Меси, Меси“ и со гестикулација да покаже што мисли за таквото однесување.
Фудбалерите на неговиот Ал Наср загубија неодамна во дербито на 20. коло на саудиската Премиер лига против Ал Итихад со резултат 1:0, а по натпреварот Кристијано Роналдо беше бесен и бурно реагираше поради поразот од неговиот тим.
Камерите потоа го фатија моментот кога тој ги шутна шишињата кои беа покрај теренот, а сега се појави ново видео на кое се гледа како реагирал откако домашните навивачи го испровоцирале скандирајќи го името на Лионел Меси.
Иако е познат како играч кој не обрнува многу вниимание на случувањата на трибините, Роналдо овојпат ги загуби нервите и на навивачите им покажа што мисли за нивното скандирање.
Откако првично ги крена рамениците, со рака покажа дека „зборуваат премногу“ и од говорот на телото можеше да се забележи дека не му е баш најпријатно, а уште помалку сеедно.
По победата во дербито, Ал Итихад е прв на табелата со 47 бодови, додека Ал Наср е втор и има бод помалку.
Во оваа сезона Роналдо одигра вкупно седум натпревари во првенството на Саудиска Арабија, на кои постигна осум гола и забележа две асистенции.