Ѕвездата на Friends, Метју Пери се појави на Фестивалот на книги на LA Times во саботата и за време на панелот ѝ кажа на публиката дека планира да го отстрани името на Ривс од идните изданија на неговите мемоари од 2022 година насловени „Friends, Lovers, and the Big Terrible Thing“.
Мемоарите се искрен приказ за борбата на Пери со злоупотреба на супстанции и зависност, но актерот се соочи со бурни реакции минатата есен поради спомнувањето на Ривс во книгата, при што некои сметаа дека напишаното е навредливо, вклучувајќи го делот за смртта на неговиот пријател Ривер Феникс во 1993 година.
„Ривер беше убав човек, одвнатре и однадвор – премногу убав за овој свет, се покажа. Се чини дека секогаш паѓаат навистина талентираните момци“, напиша Пери. „Зошто оригиналните мислители како Ривер Феникс и Хит Леџер умираат, но Кијану Ривс сè уште оди меѓу нас?“, стои во оригиналното издание на книгата.
Пери претходно се извини за коментарот, велејќи во изјава за People во октомври 2022 година дека е „голем обожавател“ на Ривс и декаа избрал „случајно име“.
„Се извинувам. Требаше да го наведам своето име“, додаде тој во изјавата.
Во саботата, Пери уште еднаш се огласи по ова прашање, истакнувајќи дека „секоја идна верзија на книгата нема да го содржи името на Кијану Ривс“.
Пери претходно му се извини на Ривс, но во саботата рече дека допрва треба лично да му се извини на популарниот и обожаван актер.
„Ако налетам на човекот, ќе му се извинам. Едноставно се изглупирав“, заклучи Пери.