На официјалната прес-конференција пред утрешниот дуел со Малта селекторот Благоја Милевски зборуваше за сериозноста на натпреварот и за голманското место.
„Овој натпревар против Малта е најважен во моментов. Малта на натпреварот во Скопје покажа дека е квалитетна репрезентација, цврсто се бореше и беше многу агресивна. Не смееме да бидеме помалку концентрирани отколку со Италија, мора да дадеме сѐ од себе. Момците се многу свесни што значи овој натпревар“, изјави Милевски.
Додаде дека сите повикани играчи се кандидати за настап на овој натпревар и дека нема да ги избира играчите според нивната клупска минутажа. Сепак, за некои играчи медицинскиот персонал ќе треба да даде одобрение.
„За жал, Димитриевски го плати цехот на лошиот терен во Скопје. Шишковски е одличен чувар и имам целосна доверба во него“, додаде Милевски за позицијата прв голман. Голманот на Шкендија, Давор Талески, денеска пристигна во Малта за да пополни местото трет голман.
Малта ќе ја пречека Македонија на стадионот „Граунд Нцјонали Та' Али“во вторник од 20:45 часот.