Репрезентацијата на Уругвај го освои Светското првенство за фудбалери до 20 години. Беа подобри од селекцијата на Италија со 1:0. Финалето на Мундијалот се играше на стадионот „Диего Армандо Марадона“ во Ла Плата.
Дуелот беше решен со голот на Лусиано Родригес во 86. минута.
Работата на младите Уругвајци им беше олеснета од 81. минута кога во соблекувалната беше испратен Матео Прати.
Инаку, натпреварот не изобилуваше со многу шанси, но Уругвај ја заслужи победата и трофејот. Фудбалерите на Уругвај доминираа бидејќи имаа 15 удари кон противничкиот гол, а Италијанците само два и тоа двата блокирани. „Аѕурините“ практично финалето го завршија без удар во рамките на голот.
Ова е прва титула светски шампион за Уругвај на оваа возраст. Бронзениот медал во Аргентина го освои селекцијата на Израел, која беше подобра од Јужна Кореја со 3:1.
