Институтот за проучување на војната (ISW) објави нова анализа за војната во Украина, осврнувајќи се на проблемите со кои се соочува рускиот претседател Владимир Путин.
Членови на руска фракција продолжуваат да го изразуваат незадоволството од руските воени дејствија во Украина, што укажува дека Путин и понатаму мора да се бори за да ги смири оние околу него, стои во анализата.
Фракцијата се однесува на луѓе од внатрешниот круг на Путин, кои ги распоредуваат борбените сили во Украина, објаснува ISW.
Чеченскиот лидер Рамзан Кадиров порача дека рускиот одговор на наводните украински напади на руска територија бил „слаб“, акцентирајќи дека Русија мора да ги „избрише украинските градови“.
Кадиров наведе дека Русија сега е во војна со Украина, а не во „специјална воена операција“ со оглед на тоа што украинските сили се борат на „руска територија“. Истакна дека е незадоволен од руската одмазда, иако е воведена воена состојба.
Членовите на руската фракција директно се соочиле со Путин во врска со развојот на руската војна во Украина, што дополнително го нагласува нивното значење внатре во руските структури на моќ и власт. Washington Post, повикувајќи се на американски разузнавачки служби, откри дека финансиерот на Вагнер групата, Евгениј Пригожин, остро го критикувал руското Министерство за одбрана и наводно го обвинил Министерството дека премногу се потпира на Вагнер групата, а притоа не успеало да ги обезбеди потребните ресурси.
Пригожин се осврнал на извештајот на Washington Post и негирал дека некогаш ги критикувал руските вооружени сили, но ISW пишува дека одрекувањето е лажно со оглед на неговите јавни напади на Министерството за одбрана.
Според ISW, се истакнува дека режимот на Путин многу зависи од информацискиот монопол, а Пригожин може да го загрози со оглед на тоа дека користи поголем број платформи за собирање на истомисленици.
