Министерството за образование и наука реагира на објавите во кои се посочува дека на иницијатива на Mинистерството и Владата двојно ќе се зголемува партиципацијата за студирање на државните високообразовни установи на сите три циклуси на студии.
Се работи, како што велат, за невистинита информација.
„Апелираме студентите да бидат спокојни бидејќи и натаму ќе ги плаќаат истите износи за државната и за квотата со кофинансирање, кои важат во моментот.
Во комуникација со Универзитетот ‘Св. Кирил и Методиј’ во Скопје добивме информација дека Ректоратот побарал мислење од факултетите и единиците во состав за тоа дали износите што во моментот се плаќаат се оправдани или можеби треба да претрпат одредени корекции. Но, тоа е интерно инициран процес“, се вели во официјалното соопштение на МОН.
Министерството за образование и наука, како што е прецизирано во соопштението, го почитува принципот на инклузивност при креирањето на политиките и носењето на одлуките, така што ги уверуваме студентите дека ниту една одлука, која го засега нивниот образовен процес, нема да биде донесена без да бидат вклучени организациите што ги застапуваат идните академски граѓани. Износите на партиципација остануваат идентични како и досега.
