Трите видеа на кои се гледаат средби на американски поморски авиони со НЛО-а се вистински, призна Американската морнарица додавајќи дека никогаш не смеело тие да бидат пуштени во јавност.
„Трите видеа на кои воени авиони наидуваат на неидентификувани воздушни феномени никогаш не требаше да бидат пуштени во јавноста. Видеата се оригинал, а нивната содржина не може да се објасни“, вели Џозеф Градишер од Американската морнарица.
Тој не сака да го употреби зборот НЛО, бидејќи и покрај тоа што не знаат што се, а брзината со која се движат е вон способностите на било кој земјен летечки објект, нема докази дека станува збор за објекти од вонземно потекло. Затоа од неодамна американските власти милуваат да го употребуваат терминот НВФ (неидентификуван воздушен феномен) само за да се дистанцираат од НЛО кое асоцира на вонземјани.
Видеата беа објавени во 2017 година. Иако беа декласифицирани, сепак никогаш не добиле дозвола да бидат јавно објавени.
