Рускиот заменик-министер за надворешни работи Сергеј Рјабков денеска истакна дека Москва нема намера да ја преиспита одлуката за суспендирање на договорот за нуклеарно оружје Нов СТАРТ со Соединетите Американски Држави додека земјата не ја промени својата политика кон Украина.
„Сè додека Соединетите Американски Држави не го сменат своето однесување, додека не видиме знаци на здрав разум во она што го прави во однос на Украина... нема изгледи за преиспитување на одлуката за суспендирање на Нов СТАРТ“, рече Рјабков, според новинската агенција Интерфакс.
Интерфакс пренесува дека Рјабков рекол дека двете земји продолжиле да разговараат за прашањата поврзани со договорот преку „затворени канали“.
Агенцијата пренесува дека рускиот министер за надворешни работи изјавил дека Русија е подготвена да комуницира и да размени информации со Вашингтон за Нов СТАРТ.
Претседателот Владимир Путин минатата недела објави дека Москва привремено го суспендира своето учество во договорот, обвинувајќи ја Америка дека се обидува да и нанесе стратешки пораз на Русија во Украина.
Потоа го потпишал и законското решение за суспензија.
Договорот беше потпишан во 2010 година од тогашните претседатели Дмитриј Медведев и Барак Обама со цел да се ограничи бројот на стратешки нуклеарни боеви глави што секоја страна може да ги распореди. Во исто време беа извршени низа меѓусебни инспекции, а земјите разменија важни информации.
Договорот е последен во серијата за ставање крај на трката за вооружување од Студената војна меѓу Вашингтон и Москва, а треба да истече во 2026 година.
Воените аналитичари веруваат дека неуспешното обновување на тој договор ќе го зголеми нуклеарниот ризик во време на засилени несогласувања околу војната во Украина.
Путин неодамна отворено најави дека ќе продолжи да работи на масовно производство на хиперсонични ракети од типот Kinzhal, кои се лансираат од воздух.
„Ќе продолжиме со масовното производство на хиперсонични ракети од типот Kinzhal, кои се лансираат од воздух. Покрај тоа, ќе започнеме и масовно производство на хиперсонични ракети од типот Zirkon, кои се лансираат од морето“, рече Путин тогаш.
Во изјавата што неодамна ја објави Кремљ, тој потоа рече дека, како и досега, ќе посвети посебно внимание на зајакнувањето на нуклеарната тријада.
Зборот „тријада“ во контекст на нуклеарното оружје се однесува на нуклеарни проектили лоцирани на земја, во морето и во воздухот.
Тој најави дека годинава за прв пат во вооружените сили на Руската Федерација ќе влезат интерконтинентални балистички ракети од типот Сармат, оружје способно да носи повеќе нуклеарни боеви глави.
