Денеска, по пауза од две децении, Русија го рестартираше производството на Москвич, автомобилски бренд од советската ера, во поранешната фабрика на француски Renault, соопшти руското Министерство за индустрија и трговија.
Во мај, Renault продаде мнозински удел во автомобилскиот производител Автоваз на руската држава, наводно за една рубља, со можност за откуп во рок од шест години.
Француската компанија исто така за една рубља ја продаде фабриката која сега се нарекува Московскa автомобилска фабрика Москвич, потсетува Reuters. Таа фабрика сега треба да го произведува Москвич, автомобилски бренд од ерата на Советскиот Сојуз. „Првиот Москвич ќе излезе од производната линија во декември 2022 година“, соопшти рускиот производител на камиони „Камаз“, технолошки партнер на фабриката.
Целта е да се произведуваат 100.000 примероци годишно
Крајната цел е да се произведуваат 100.000 возила Москвич годишно, вклучувајќи ги и нивните електрични верзии, значително помалку од просекот за автомобилската индустрија, чии фабрики произведуваат од 200.000 до 300.000 автомобили годишно.
Оваа година би требало да се произведат 600 примероци. Москвич би можело да се врати во изменета верзија бидејќи ќе биде произведен користејќи ги дизајнот, инженерството и производствената платформа на кинескиот производител на автомобили JAC, изјавија неименувани извори за Reuters.
Западните санкции против Русија поради нејзината инвазија на Украина го отежнаа пристапот до делови произведени од странство, а многу странски производители на автомобили ја напуштија земјата. „Камаз“ и руската влада воспоставија нови синџири на снабдување, но не откриваат детали.
Москвич е опишан како урбан теренец
„Во блиска иднина задача е да се воспостават процеси на склопување од мал обем со вклучување на локални добавувачи до крајот на 2023 година“, се вели во изјавата на министерот за индустрија и трговија Денис Мантуров. Министерството најави дека со почеток на целосно производство ќе се овозможи отворање на дополнителни 40.000 работни места.
Москвич 3, опишан како урбан теренец со бензински мотор и автоматски или мануелен менувач, ќе биде пуштен во продажба во декември, соопшти Министерството. Релансирањето на Москвич веројатно нема да ги промени мрачните прогнози за руската автомобилска индустрија, која би можела да продаде помалку од еден милион автомобили оваа година за прв пат во модерната историја на Русија, забележува Reuters.
