Фудбалерите на Рома синоќа во 14. коло од Серија А го совладаа Сасуоло со 2:1, а Жозе Мурињо по натпреварот ги изненади новинарите бидејќи не сакаше да зборува на италијански.
Мурињо иронично рекол дека неговиот италијански „не е доволно префинет“ и решил натпреварот да го коментира на португалски, па затоа со него беше и клупскиот преведувач на Рома, пишуваат медиумите во Италија.
„Зборувам португалски затоа што мојот италијански не е доволно полиран и силен за да изразам одредени концепти“.
„Благодарност до директорот Тиагу Пинту и остатокот од раководството на клубот. Во последните неколку часа ми ја дадоа потребната поддршка за да ја завршам мојата работа на најдобар начин. Тимот одигра добро и јас сум многу среќен за моите играчи и навивачите“, рече Мурињо на португалски, а потоа триумфот му го посвети на суспендираниот помошник во стручниот штаб, Салваторе Фоти, кој заработи црвен картон на претходниот натпревар против Удинезе.
„Победата му ја посветувам на Салвторе Фоти. Тој денеска не беше во тимот, но работеше напорно и победата му припаѓа и нему“, додаде Португалецот.
Инаку, Мурињо моментално е под истрага од Италијанската фудбалска федерација (ФИГЦ) бидејќи ја доведе во прашање „емоционалната стабилност“ на судијата Матео Марсенаро пред синоќешниот натпревар.
„Кога зборував за емоционална стабилност, мислев на квалитетот потребен за настап на највисоко ниво“, се правдаше Мурињо по натпреварот, а останува да видиме дали ова ќе го убеди првиот човек на ФИГЦ да не го казни.
Рома моментално е четвртопласираната екипа во Серија А со 24 бода, дури 11 помалку од лидерот Интер.