Жозе Мурињо синоќа остварил разговор со Андреа Белоти за да го убеди поранешниот голгетер на Торино да се пресели во Рим.
Андреа Белоти иако уште во јуни си замина од Торино сѐ уште не нашол нов клуб. Репрезентативецот на Италија мина 7 сезони во дресот на Торино, беше и капитен, но тимот не само што не освои ниту еден трофеј, туку и никогаш не беше ни во конкуренција за такво остварување, што беше главната причина за заминувањето на Ломбардиецот.
Медиумите во Италија известуваат дека Жозе Мурињо синоќа стапил во контакт со Белоти во обид да го убеди да дојде кај него во Рома, со што нападот на „Волчицата“ би добил екстра засилување. Белоти на маса има понуди од Галатасарај и Ница, но и двата клуба не се на компетитивно ниво на кое тој смета дека е дојдено време за да игра. Белоти во декември ќе наполни 29 години, а на клупско ниво освен пехарот со Палермо за освојување на Серија Би во сезоната 2013/13, нема друго ништо. Но, со Италија има златен медал од ЕУРО 2020.
Доколку Мурињо успее да го донесе Белоти, тогаш нападот на Рома ќе биде убиствен бидејќи таму се и Теми Ејбрахам, Пауло Дибала, Николо Ѕаниоло и Стефан Ел Шаарауи. Доаѓањето на Белоти воедно ќе значи заминување на Џастин Клајверт, кој секако цело време го праќаат по позајмици, и многу веројатно праќање на позајмица на младиот Феликс Афена-Џан, кој е вишок во тимот особено ако Узбекистанецот Елдор Шомуродов не ја напушти Рома. Мурињо не смета на него, но репрезентативниот напаѓач на Узбекистан досега ги одби сите понуди за заминување.
Освен Торино и Палермо, Белоти има играно и за АлбиноЛефе, каде и ја почна сениорската кариера. Потекнува од Калчинате, мало гратче близу Бергамо во Ломбардија. За Италија има 44 натпревари и 12 гола, а првиот гол го постигна во Скопје во октомври 2016 година кога во квалификациите за Мундијалот 2018 Италија славеше против Македонија со 3:2 во еден крајно интересен натпревар.