Ако не можеш да ги победиш, придружи им се - токму од тоа мото голманот Хуан Мусо се инспирирал за да го облече дресот на Аталанта.
Аргентинскиот голман летоска стана едно од најскапите засилувања на клубот од Бергамо откако за 20 милиони евра беше доведен од редовите на Удинезе.
Во Удине мина три сезони и со своите одбрани се наметна како еден од најдобрите голмани во Серија А, а стана и репрезентативец на својата Аргентина.
Но, секогаш кога Удинезе играше против Аталанта, мрежата на Мусо се полнеше. На шесте натпревари во трете сезони прими вкупно 19 голови вклучувајќи и пораз од 7:1.
„Трансфер пазарот беше во депресија поради пандемијата, а Аталанта секако не се научени да трошат многу, така да чувствувам голема одговорност. Со тие пари Аталанта можеше да го купи било кој, но ме одбраа мене“, рече Мусо во интервју за аргентинскиот дневен весник La Nación.
„Секој пат кога игравме против нив ни даваа куп голови. Аталанта беа тимот од кој најмногу се плашев. Еднаш ни дадоа 7, друг пат 4, па 3...“, открива тој.
„Мислам дека само Луис Муриел ми даде 8 гола на 5 натпревари. Кога слушнав дека се интересираат за мене, му реков на агентот будно да ја следи ситуацијата“.
Аталанта го донесе Мусо како замена за Пјерлуиџи Голини кој замина во Тотенхем.
„Луѓето можеби не ја гледаат Аталанта како голем клуб, но според мене тие играта како таков. Не му се плашиме никому“, смета Мусо.
За Аргентина засега има само 2 настапа, но е еден од двајцата резервни голмани. Беше дел и од освојувањето на Копа Америка летоска, иако не настапи на ниту еден натпревар. Последниот настап му е минатиот месец во победата од 3:0 над Боливија во мундијалските квалификации. Деновиве повторно е со репрезентацијата за новите натпревари.