Министерството за здравство информира дека во моментов на Клиниката за урологија во тек се две трансплантации на бубрег од починат донор.
Двајца пациенти на возраст од 30 и 23 години кои подолго време се на дијализа, ќе добијат бубрег од 44-годишната пациентка која вчера беше дијагностицирана со мозочна смрт.
Рано утрово заврши трансплантацијата на срце кај пациент кој подолго време боледува од срцева слабост. Пациентот е во стабилна состојба и закрепнува по операцијата.
Најголема благодарност Министерството за здравство упати кон семејството на 44-годишната жена која спаси најмалку три животи.
– Благодарност до нејзиниот сопруг, нејзините деца и најблиското семејство. Тие покажаа што значи хуманост во најтешки моменти, нагласуваат од МЗ.
Оттаму упатуваат благодарност до тимовите за експлантација и трансплантација од Клиниката за урологија предводени од д-р Сашо Дохчев и д-р Сотир Ставридис, кои изминативе 20 часа ги работеа интервенциите во операционите сали, како и до медицинскиот персонал од Клиниката за нефрологија и Клиниката за трансфузиологија кои ги подготвија младите пациенти кои ги примија органите.
– Во исчекување сме на следната трансплантација на коски, по експлантацијата која во раните утрински часови ја заврши тимот за трансплантација од Клиниката за ортопедија, се посочува во соопштението.
Трансплантацијата на органи е тимска работа и во неа учествуваат пореку десет клиники и околу стотина лекари, медицински сестри и болничари во координација со Министерството за здравство и Националниот координатор за трансплантација, др Маја Мојсова Мијовска.
МЗ упатува голема благодарност до болничките координатори од КАРИЛ и Неврохирургија кои ги водат пациентите во мозочна смрт и разговараат со смејството за можноста за донирање на органите, во тие најчувствителни моменти, како и до тимовите во Рентген институот, од Институтот за трансфузиологија, од Клиниката за нефрологија и Клиниката за кардологија како и тимовите за трансплантација од хируршките клиники и тоа Кликината за кардиохирургија, Урологија и Ортопедија, како и од приватната болница Жан Митрев.
– Во период од само 24 часа од поставување на дијагнозата за мозочна смрт сите овие тимови направија експлантација и трансплантација на повеќе органи и покажаа како беспрекорно функционира здравствениот систем, наведуваат од МЗ.
Во изминатата една година во земајва се направени пет трансплантации од починат донор и притоа се трансплантирани четири срца и 10 бубрази.
Направена е и прва експлантација и трансплантација на коски и коскени ткива.
