Речиси целосно бела женка пингвин е забележана на Антарктик во чилеанската база „Габриел Гонсалес Видел“.
Женката е фотографирана како ужива во ледената средина на почетокот на јануари и припаѓа на видот генту, кој вообичаено има црно-бели пердуви, но овој примерок е речиси целосно бел.
„Тоа е животно со леукизам, така што иако пигментот е присутен, не е случај со целото тело. Вакви случаи може да се најдат кај различни видови, таквите животни имаат пигмент, но тој не е универзален. Затоа, може да зборуваме за леукизам, кој се разликува од албинизмот каде што има целосен недостаток на пигмент“, вели ветеринарот Диего Пеналоса.
Овие пингвини се многу ретки, а со оглед на тоа што ги немаат типичните црно-бели бои кои служат како камуфлажа при лов на риби, на предаторите им е полесно да ги забележат и ловат.
„Овде сме 14, живееме среде колонија на генту пингвини. Ги има стотици, тоа е неверојатно. Секој ден гледаме нешто ново. Антарктикот е прекрасно место“, вели фотографот кој го снимил реткиот бел пингвин.