Наскоро се ближи крај на делењето лозинки на Netflix, што ќе биде предизвик и за гледачите и за стриминг платформата.
Компанијата со години го одложуваше овој момент. Сепак, од Netflix истакнаа дека делењето лозинки е главен проблем што ги „јаде“ претплатите во 2019 година, но компанијата беше загрижена како ќе го реши тоа без отуѓување на корисниците.
Потоа се случи ковид пандемијата со што настана нов бран претплатници, а напорите за тоа исчезнаа, пишува The Wall Street Journal.
Netflix не го следеше планот за сузбивањето на оваа пракса сè до оваа година, бидејќи се намали бројот на претплатници.
„Над 100 милиони гледачи на Netflix сега гледаат користејќи лозинки кои ги позајмуваат од членови на семејството или од пријателите“, велат од Netflix.
Изгледа конечно решиле да стават крај на тоа и од 2023 година ќе бараат плаќање и од луѓето кои делат лозинки. Компанијата очекува да почне со примена во САД од почетокот на годината.
„Мислам дека овој потег нема веднаш да им се допадне на потрошувачите“, изјави Тед Сарандос, директор на Netflix.
Ова е голем пресврт за компанијата која еднаш твитна „Љубовта е делење лозинки“.
