Ешли Барти, најдобрата тенисерка во светот, одлучи да се пензионира. Иако се очекуваше дека во наредните години ќе воспостави доминација, сепак тоа нема да се случи, пренесе BBC.
Барти е актуелна шампионка на Австралија опен, а минатата година го освои Вимблдон. Во 2019 година го освои и Ролан Гарос.
„Среќна сум и подготвена да го направам тоа. Знам дека во овој момент во моето срце, за мене како личност, ова е вистинската работа што треба да ја направам“, соопшти Барти.
Единствениот Грен слем кој не успеа да го освои е УС Опен, каде максимумот за неа беше четвртото коло, во два наврата.
Барти им се заблагодари на сите кои ја поддржаа досега, за заедничките животни искуства и успеси. Таа има постигнато 305 победи и 102 порази, а досега заработи 23.829.071 долари.
Нејзиното повлекување ја изненади јавноста и предизвика различни реакции.