Меѓународниот институт за фудбалска историја и статистика (IFFHS) го прогласи голманот на италијанската репрезентација и Пари Сен Жермен - Џанлуиџи Донарума - за најдобар голман за 2021 година.
Тој славеше пред Мануел Нојер од Баерн и Едуар Менди од Челси, додека Топ 5 го заокружија со Емилиано Мартинес (Астон Вила) и Јан Облак (Атлетико Мадрид).
Донарума, најдобриот играч на ЕУРО 2020 и европски првак, убедливо славеше во изборот за најдобар пред Нојер, кој петпати ја освојуваше оваа награда. Донарума собра 170 поени, а Нојер 75.
Уште едно признание за одличниот 22-годишен голман, но не менува многу што се однесува до неговата позиција во клубот.
За потсетување, Донарума пристигна во ПСЖ во текот на летото како слободен играч откако му истече договорот со Милан.
Досега за клубот има одиграно осум натпревари, од кои шест првенствени и два во Лигата на шампионите.
Дванаесет години постариот Кејлор Навас собра повеќе настапи во двете натпреварувања, девет во Лиг 1 и три во Лигата на шампионите.
