Славниот режисер Стивен Спилберг досега има соработувано со најдобрите актери во оваа работа, а во претходно интервју откри кои му се омилени.
Иако има соработувано со актери како Леонардо Дикаприо, Том Круз и Лијам Нисон, нивните имиња не се најдоа на неговата листа со омилени актери.
Во едно интервју познатиот режисер се присети на разговорот со колегата и режисер Стенли Кјубрик, по гледањето на филмот „The Shining“, за кој вели дека баш не му се допаднал. Спилберг му објаснил на режисерот дека Џек Николсон е навистина талентиран актер, но начинот на кој ја одиграл улогата во филмот бил претеран. Дури и го споредил со јапонски театар во кој актерите се многу стилизирани и со драматична костимографија и шминка.
Во одбрана на изведбата на Николсон, Кјубрик побарал од Спилберг да ги наведе неговите пет омилени актери на сите времиња. Интересно е тоа што ниту еден од актерите со кои Спилберг има соработувано, не се нашол на листата.
Кои имиња се најдоа?
Спенсер Трејси, Хенри Фонда, Џејмс Стујарт, Кери Грант и Кларк Гејбл се најдобрите актери на сите времиња, според мислењето на режисерот Стивен Спилберг.
„Добро, а каде е Џејмс Кегни на листата?“, запрашал изненадениот Кјубрик.
Спилберг му одговорил дека актерот котира високо на листата, но едноставно не е меѓу првите пет.
„Значи тој не е меѓу првите пет омилени актери. Вие не сметате дека Џејмс Кегни е еден од петте најдобри актери во светот, но јас сметам. Затоа и изведбата на Николсон е одлична“, му одговорил Кјубрик во таа прилика.