Од крајот на март до средината на мај наредната 2022 година пистата на скопскиот аеродром ќе се реновира и поради тоа летовите нема да се одвиваат 24 часа.
Од ТАВ Македонија информираат дека како дел од инвестицискиот план за експанзија и реновирање на македонските аеродроми, следната година, почнувајќи од 28 март до 16 мај, во времетраење од 50 дена, ќе се изврши рехабилитирање на пистата на скопскиот аеродром.
Поради тоа авиосообраќајот на Меѓународниот аеродром Скопје во тој период ќе се одвива од 17:30 часот попладне до 9:00 часот наутро.
Тоа значи дека пистата нема да биде целосно затворена, туку само во периодот од 9 наутро до 17:30 попладне кога секојдневно ќе се врши реновирање. Сите летови ќе бидат вклопени во останатиот дел од деноноќието.
Веројатно новото работно време на пистата ќе влијае врз одредени авиокомпании чии летови се токму во петиодот предвиден за реновирање, па од ТАВ дополнително ќе информираат за измените и редуцирањето на летовите.
