Кина го отфрли како неодговорно обвинението од директорот на НАСА, дека сакаат да ја преземат Месечината како дел од воена програма. Оваа земја тврди дека секогаш повикувала на изградба на заедница од нации во вселената.
Во изминатата деценија, Кина го засили темпото на нејзината вселенска програма, фокусирајќи се на истражување на Месечината. Првин слета на Месечината без екипаж во 2013 година и сега се очекува да лансира ракети доволно моќни за да испратат астронаути кон крајот на оваа деценија.
„Мора да бидеме многу загрижени што Кина слета на Месечината и вели дека е нивна“, изјави во интервју за германски Билд Бил Нелсон, администратор на НАСА.
Шефот на американската вселенска агенција изјави дека кинеската вселенска програма е воена програма и дека Кина украла технологија и идеи од други.
„Не е првпат шефот на американската Национална управа за аеронаутика и вселена да ги игнорира фактите и неодговорно да зборува за Кина“, изјави Жао Лиџиан, портпарол на кинеското Министерство за надворешни работи.
Додава дека Кина секогаш промовирала изградба на заедничка иднина за човештвото во вселената и се противи на вооружување во вселената.