Кливленд е домаќин на НБА Ол-стар викендот, а традиционално големо внимание привлекува натпреварувањето во забивање во кое победи кошаркарот на Њујорк Никс, Оби Топин.
Топин беше најконстантен од почетокот до крајот, постигнувајќи најмалку 44 поени во сите 4 обиди. Тој во финалето го надмина Хуан Тоскано-Андерсон од Голден Стејт Вориорс.
Кошаркарот на Њујорк Никс заби откако ја протна топката низ неговите нозе, ја одби од таблата, а потоа поентираше со едната рака, освојувајќи 47 поени во последниот обид.
Сепак, според многу проценки, ова беше едно од најлошите натпревари во забивање, бидејќи очекуваниот спектакл во голема мера изостана.
Карл-Ентони Таунс од Минесота Тимбервулфс беше одличен во натпреварувањето за тројки. Тој имаше дури 29 успешни обиди во финалето, што е втор најдобар резултат во историјата зад Стеф Кари минатата година.
Таунс е првиот „голем“ човек кој победил во натпревар во шутирање 3 поени од Кевин Лав во 2012 година. Тој е и вториот највисок победник по Дирк Новицки во 2006 година.
Предизвикот за вештини вклучуваше натпреварување на три тима со по тројца играчи. Тим Кавс, Тим Адетокунбо и Тим Рукс се изборија за титулата, а дебитантот на Кливленд Кавалирс, Еван Мобли, погоди удар од половина терен и ѝ донесе победа на домашната екипа во последната рунда.
Да потсетиме, Леброн Џејмс и Кевин Дурент се капитени на тимовите на вечерашниот Ол-стар натпревар.