По полетувањето на првиот сончев балон во стратосферата пред седум години, научниците открија дека тој регистрира звуци кои не можат да се споредат со било што друго досега регистрирано.
Кога научниците прв пат пред седум години во стратосферата испратиле сончеви балони за да лебдат и да ги регистрираат сите промени и случувања во неа, не ни помислувале што сѐ можат да откријат. Со тек на време, покрај бројните собрани информации, почнале да фаќаат и нечујни нискофреквентни сигнали кои до ден денес остануваат неидентификувани.
„Знаеме да ги препознаеме звуците од експлозии, пад на метеори, авиони, грмотевици и градови. Но, речиси секој пат кога горе испраќаме балони наидуваме на звуци што не можеме да ги идентификуваме“, открива Дениел Боумен од Националниот институт Сандија во Ново Мексико, САД.
Како што веќе споменавме, се работи за сончеви балони што можат да останат во стратосферата неколку часа. Во текот на сите овие години, 50 од нив собирале податоци од слојот помеѓу мезосферата и тропосферата, на надморска височина од 10 до 55 километри.
Првото нешто што научниците го заклучиле е дека стратосферата звучи сосема поинаку од она што имаме можност да го слушнеме на површината на нашата планета, бидејќи балоните биле над ветровите и снимиле турбуленции од други различни делови на атмосферата и инфразвучни сигнали што потекнуваат од морските бури. Но, и еден куп од нив за кои научниците не можеле да го утврдат потеклото.
„Овие мистериозни сигнали би можеле да бидат поврзани со типови на атмосферски турбуленции што никогаш претходно не биле снимени. Но, треба да се забележи дека досега многу ретко сме истражувале звуци во стратосферата, па затоа е тешко да се извлечат дефинитивни заклучоци“, вели Боумен.
Исто така додава и дека такви проекти постоеле и порано, но дека тоа биле главно тајни обиди на американската војска да открие инфразвучни сигнали за време на тестирањето на нуклеарното оружје на СССР. Поради сето ова, се појавија теории на заговор поврзани со вонземјани и НЛО објекти.
Сепак, научниците тврдат дека нема цврсти факти што укажуваат на тоа дека некој од друга галаксија испраќа сигнали, како и дека постојат уште многу работи што не ги знаеме за нашата планета и природните појави што можеби влијаат на создавањето на овие мистериозни звуци.
